نوري ثابت وشروط الصحافة

نوري ثابت وشروط الصحافة

- ثورنا الصحافي
- ايه... سيدي حبزبوز
- ولاتهون
- اني صارلي 7 سنين اشتغل وياك وجنت اوفى واخلص من كل الي اكلو نعمتك وجحدوهه مو تمام.
- ا ي ابديني تمام

- واني هسه استرحم منك بان تأذن لي بتقديم امتياز لجريدة اسبوعية اسوة بالبقية.
- عجايب؟؟؟؟؟
- ليش عجايب قابل الذين اصبحو في مصاف الصحفيين احسن مني اذا همه لابسين قوط اني لابس بونجور واذا لابسين مناظر باغه اني لابس ذهبيه واذا ايكمشون القلم باناملهم اني اكمشه بظلفي واعطي القلم حقه احسن منهم.
- كل هذا صحيح ولكن هناك شروط يجب ان تتوفر بيك
1- ان تكون عراقيا.
على راسي وهاي ورقة الجنسية مسجلة بدائرة البيطرة.
2- لازم عمرك اكثر من 25 سنة.
طيب اني من مات ابويه سنة 1918 رثاه الملا عبود الكرخي بقصيدة واللي كال بيهه
وين اودي سجته وفدانه......... يوم الاكشر يوم عض السانه
جان ابذاك الوكت عمري 10 سنين فاحسب حسابك اليوم عبرت ال 30 واستحق نيابة مو صحافه.
3- لازم اتكون غير محكوم بجناية غير سياسية او جنحة مخلة بالشرف.
هاي اسهل مايكون هذه دائرة التحقيقات الجنائية (سي. أي. دي) واسأل في شعبة طبع الاصابع عن طبع ظلفي.
4- يجب ان تكون متخرجا من مدرسة عالية وعندك شهاده ومن ذوي السمعة الحسنه
اما مسألة السمعة الحسنة فسيدي اعرف بها من غيره واما مسألة الدراسة والشهادة فهذه اسهل مايكون اذهب الى وحدة من الدول المجاورة واصرف جم فلس وجيبلك احسن شهادة عالية والسلام.
5- يجب ان تكون غير موظف وغير عضو في مجلس النواب.
الحمد لله اني لانائب ولا موظف.
6- يجب ان يكون لديك محل اقامة!!
- محل اقامتي في زرائب الجاموس في محلة العوينة وهذا محل عجزت كل السلطات عن تغيير محله!!!!
- هذه الشروط السته في قانون المطبوعات وماكو غيرهه.
- ولقد وجدتها متوفرة في خادمكم المطيع (بحذف العين)
- نعم
- اذن انا اصير صحافي رغما عن الانوف.
- بس اكو مسألة مهمه ومهمه جدا وهي انك (ذو قرنين).
- سيدي يرحم موتاك لتخليني اكول باع واشك الكاع!!!!!!